30 / 256
30
Аллаға мадақ
Алдымнан арайланып атқан таңдай,
Атқан таңдай, жаратқан жаққан шамдай...
Жоғалттым сенімімді – серігімді
Соғылды қара тасқа аппақ маңдай!..
Ауырды нар көтермес мен көтердім,
Білемін бір күн ақыр бел кетерін!..
Ақында айтып өткен арман бар ма –
Түймедей тисе болды елге себім!
Жаяулап жеткен кім бар жер шегіне,
Алланың амал бар ма бермесіне?!
...Айтсам деген сырым да, шыным да осы –
Тәңірдің Нұры түскен пендесіне!..
***
«...Адасқандарды Алла ғана ақ жолға жетелейді...»
Жүніс сүресі, 35 аят.
Жаратқан ием, күнаһар құлмын
Санасын тұрмыс билеген!
Айтағына еріп сайтан мен жынның –
Құлқынның қамын күйлеген!..
Жаратқан ием, жаңылсам кешір
Адасқан соқыр пендеңмін!..
Өкінішпенен өткізген есіл
Келер ме қайтып өлген күн?!
Жаратқан ием! Айыбым шексіз
Амал не, бәрін кеш ұқтым!..
Алайда мынау өмірге ессіз –
Бәрібір бірақ ғашықпын!..