28 / 256
28
Аллаға мадақ
«... Адамдардан есеп алатын уақыт таяды,
бірақ олар қаперсіз күйде... »
Таһа сүресі, 79 аят.
Арылу
...Жетем деп жарлы байға, бай құдайға
Жарысқа жанталасқан жан шыдай ма?
Бұл жалған, боқ дүние жоқ секілді
Бір күні өтер деген ешбір ойда!..
Келмейтін сирағынан Сырдың суы,
Билік пен дүниенің буған жыны,
Алланың атын білмес арсыздар мен
Алаяқ, арамзаның туды күні!..
Ел анау – айырылған еркінен,
Жер мынау – жан шошырлық көркінен!..
Ерлердің есі кетіп еліреді
Билік пен дүниені бөлісуден!
Тырбаңдап тіршіліктің түнегінде,
Білсе де жеңілерін түбі өлімге.
Біткенше ақтық демі арпалысқан
Адамға қанша керек бұл өмірде?!.
Тәңірім тартқызбасын жан азабын,
Фәниден сен де бір күн жоғаларсың!..
Арқалап алып кеткен адам бар ма –
Артыңда ойладың ба не қаларын?
Алайда, айтылған сөз – атылған оқ,
Дертімді әуре болман жасырған боп...
Мықтылар менсінбейді біз байғұсты
Дегендей ақша жоқта – ақыл да жоқ!