64 / 256
64
Ынталандыру сыйлығының иегері
Шорабек Айдаров
Алматы қаласы.
Шеберді шебер дегенше,
Алланышебер десеңші...
Айналамнан ғажап сыр аңғарамын,
Жаратыпты-ау мүлтіксіз Алла бәрін.
Басқа түгіл бойыма қарап тұрып,
Өзіме-өзім мен кейде таң қаламын.
Отырған ем, орнымнан түрегелдім,
Тұрған едім, адымдап жүре бердім.
Қозғалысқа, қимылға негізделген,
Менің өзім байқасам бір әлеммін.
Мен өзімді жоғалтам бұл әлемсіз,
Менің кеуде соғуым сірә, жөнсіз.
Еншімдегі бұл әлем еркімнен тыс,
Жатыр өзін басқарып мына менсіз.
Төрт мүшемді түгендеп сайлап алдым,
Қол-аяқты мейлінше пайдаландым.
Ал, іш құрлыс өз ісін атқарғанда,
Менің өзім білмеймін қайда қалдым?
Адам шіркін аштыққа шыдамайды,
Асты аңсайды ондайда, сірә, майлы.
Ал, асқазан өз ісін атқарарда,
Ақыл-кеңес менен еш сұрамайды.