42 / 256
42
Аллаға мадақ
Тәңір көрген жалт еткен әр ғажапты
Тура жолға салды Алла қазақты.
Жаңылғанды жолға салып Мұхаммед
Алла дінін барша жұртқа таратты.
Алланы ұқпай ақыл өсіп толмайсың,
Елді сүймей шын мұсылман болмайсың!
Осы сөзді өнеге етіп қалдырған
Уа, Мұхаммед, шапағатшы болғайсың!
Текті ел едік, ағыл тегіл тасып ек.
Жалмамасын қазағымды қасірет.
Уа, жаратқан қияметте біздерді
Пайғамбармен бір болуды нәсіп ет!
Алладан асар шебер жоқ
Жер беті, жаһан дүние мына әлемің,
Тұр ғой әр кез адамға беріп сәлемін.
Қоршаған орта, аң құсың бәрі күнәсіз,
Адамнан ғана барлығы жаман бәленің.
Жаратқан Алла аспанға күнді орнатқан,
Шуағы бөлеп тұрсын деп бәрін жан-жақтан.
Ұлығын айт деп сұрағын тәңір Алланың,
Даланы кезіп желменен ұшқан қаңбақтан.
Тауларға қарап таң қалам көкпен таласқан.
Алланы айтып зікір ғып тұрған ала аспан!
Жаңбыры жауса жеріне құнар беретін,
Барлығы заңмен, бірімен бірі жарасқан.